Кулун турар 11 күнүгэр, Тандаҕа «Улуу Кыайыы 80 сылыгар – 80 Албан аат Күннэрэ» аахсыйа чэрчитинэн «Биһиги дьиэ кэргэн Өйдөбүнньүгэ» бырайыак саҕаланна.
Бу бырайыагынан бастакы Өйдөбүнньүк күн Аҕа дойду Улуу сэриитин арҕаа фронун буойуна, сэрии, үлэ бэтэрээнэ, Байаҕантай нэһилиэгэр сибээс эйгэтигэр уһун кэмҥэ үтүө суобастаахтык үлэлээбит Петр Гаврильевич Васильевка ананна. Онон тэрээһиҥҥэ кини оҕолоро, сиэннэрэ, аймахтара 20-тэн тахса киһи кэлэн күндү ыалдьыт буолан кытыннылар.
Өйдөбүнньүк күҥҥэ Танда орто оскуолатыгар «Өйдөбүнньүк уруога», Тандатааҕы түмэлгэ ахтыы киэһэтэ тэрилиннилэр, бырайыак саҕаламмытын бэлиэтээн Кыайыы, болуоссатыгар сибэкки дьөрбөтүн ууруу буолла. Ону сэргэ Васильевтар олорбут дьиэлэрин таһыгар баннер ыйаатылар, түмэлгэ фронтовик-буойун олоҕун, бойобуой суолун, үлэтин туһунан киэҥ ис хоһоонноох быыстапка тэрээһин кыттыылаахтарын сэҥээртэ, итини таһынан Васильевтар аймах сэрии кыттыылааҕа аҕаларын, эһэлэрин туһунан альбому, мобильнай стендэни оҥотторон бэлэхтээтилэр уонна СВО волонтердарыгар харчынан көмөнү оҥордулар, оттон эдэр көлүөнэ оҕолор улахан кэнсиэри туруордулар.
«Биһиги дьиэ кэргэн Өйдөбүнньүгэ» бырайыак Байаҕантай нэһилиэгэр бүгүҥҥүттэн саҕаланан балаҕан ыйыгар диэри Аан дойду иккис сэриитэ түмүктэммит күнүн уонна биир дойдулаахтара Советскай Союз Геройа В.Д. Лонгинов төрөөбүт күнүн көрсө тоҕус бөлөҕүнэн үгүс фронтовик-буойун бойобуой суолун, олорон ааспыт олохторун сырдатыыга, үйэтитиигэ туһуланан ыытыллар.
